مراجعه بسيط لويندوز 7 Build 6956

قبل فتره قصيره كتبت عن ويندوز 7 وعن ابداع مايكروسوفت فيه واليوم بكتب تكمله ابداع مايكروسوفت في هالنظام. الموضوع اللي بكتبه اليوم ماراح يكون مركز على جديد وميزات النظام بقدر ماهو مركز على قدره النظام بالتعامل مع الشغل الثقيل نسبيا ومدى خفته واستهلاكه لموارد النظام واعتقد ان هذا موضوع يهم الجميع اكثر من مساله ميزات جديده
مواصفات الجهاز المستخدم لتجربة النظام
Dell XPS M1330 Laptop
CPU: Intel Centrino 2.5Ghz
RAM: 2GB
GPU: nVidia 8400GS 128RAM
HDD: 320GB
Battery: 6 Cell
الجهاز طبعا زي مانتوا شايفين يصنف من الاجهزه الحديثه القوية نسبيا كا هاردوير بس ايضا راح انقل لكم انطباعي عن تجربه النظام على فيرشوال بي سي برام 256 فقط فا بسم الله نبداء

اولا: تثبيت النظام
على اللاب توب استغرق تثبيت النظام من بعد اختياري للهاردسك اللي حاب اركب عليه النظام لحد مادخلت على الدسك التوب جاهز للاستخدام 18 دقيقه فقط وهو اسرع من تثبيت الويندوز فيستا ومن النسخه السابقه لويندوز 7 على جهازي واللي كانت تستغرق حوالي 25 دقيقه يعني ويندوز 7 في هالنسخه كان اسرع من ويندوز فيستا بالتثبيت بحوالي 7 دقايق.

ثانيا تعريف الهاردوير
الويندوز 7 اولا تعرف على اغلب قطع الهاردوير بس كان فيه حوالي 4 قطع ماتعرف عليها من ضمنهم كرت الشاشه بس اول ماشبكت الانترنت سحبهم كلهم وركب التعاريف بشكل كامل وانا جالس اتفرج وهو مشابهه بهالنقطه لما هو موجود حاليا بويندوز فيستا بس اللي مو مشابهه ان الويندوز ابديت بويندوز 7 اسرع من ويندوز فيستا من ناحيه البحث وايجاد عن التعاريف والتحديثات اللازمه لجهازك.

ثالثا استهلاك الذاكره
استهلاك الذاكر لويندوز 7 اقل من الويندوز فيستا سرفس باك 1 حتى مع الاستخدام ويندوز 7 يستهلك رام اقل وقوة معالج اقل من اللي يستخدمه ويندوز فيستا سرفس باك 1 طبعا كل الاثنين ماوصلوا مرحله ويندوز اكس بي في قلة استهلاك الرام بس انا اركز على قدرة النظام لاداره الرام بشكل افضل يعني انا ماشتريت رامات عشان تقعد فاضيه من غير مااستفيد منها طبعا الفائز حاليا بادارة الرام بشكل ممتاز هو ويندوز 7 يجي بعده فيستا يجي بعدهم ويندوز اكس بي وبذكر لكم بالارقام كم نسبه استهلاك كل نظام من الرام في حاله ان الجهاز مزود بـ 256 ميغا بايت رام و 1 قيقا بايت رام.

Windows XP SP3 @ 256mb = 50 % Used
Windows Vista SP1 @ 256mb = 75% Used
Windows 7 Build 6956 @ 256mb = 64% Used

على رام 256 ميغا بايت كان الويندوز اكس بي و 7 بالامكان استخدامهم وتصفح الانترنت من خلالهم بدون الحاجة للانتظار يينما كان الويندوز فيستا بطيء في الاستجابه ولما عبيت الرام ويندوز اكس بي اول من علق على 80 بالميه رام (يعني لازم اعاده تشغيل) والويندوز فيستا كانت الرام 95 بالميه مستخدمه ماعلق بس كان بطيء جداا جداا جداا بس كان يستجيب يعني اقدر اقفل النوافذ اللي انا فاتحها وافضي الرام والويندوز 7 كان نفس الفيستا يستجيب والرام كانت مليانه 95 بالميه مستخدمه بس كانت استجابته افضل بكثيييييييييير من الفيستا حتى اني شغلت الويندوز ميديا سنتر ودخلت على قناة ديسكفري وتفرجت على فيديو ماعلق علي بصراحه ادارة الرام بويندوز 7 تطورت واصبحت افضل عن ماهو موجود حاليا بويندوز فيستا.

Windows XP SP3 @ 1 GB = 22 % Used
Windows Vista SP1 @ 1 GB = 40% Used
Windows 7 Build 6956 @ 1 GB = 30% Used

على الرام 1 قيقا بايت كان الويندوز اكس بي و 7 وفيستا بالامكان استخدامهم وتصفح الانترنت من خلالهم بسرعه بس سرعه الاستجابه كانت لصالح كل من ويندوز اكس بي و 7 يعني بدون مبالغه يمكن ماتفرق بينهم بسرعه الاستجابه طبعا في الشغل الثقيل افضل نظام كان يستجيب هو ويندوز 7 بعده ويندوز فيستا بعده ويندوز اكس بي.

رابعا استهلاك المعالج والهاردسك.
ويندوز اكس بي يتميز اول ماتشغله ماتحصله يشغل الهاردسك والمعالج فا كان بامكانك استخدام سطح المكتب مباشره اول ماتسوي تسجيل دخول بس نظرا لوجود تقنيات جديده بويندوز فيستا لتحسين اداء النظام للمستخدم كان اول ماتسوي تسجيل دخول تشوف الهاردسك يشتغل والمعالج ايضا شغال تشوفه تقول تخطيط قلب .. فا تحس النظام استجابته بطيئه اول 5 دقايق بعدين يضبط معك وهذا السبب راجع لتقنيه Superfetch طبعا هالتقنيه ماهي سيئه بالعكس ممتازه بس ممكن تزعج الناس اللي تطفي وتشغل جهازها بشكل مستمر لانها اول خمس دقايق الى عشر دقايق من تشغيل النظام تلقى هالخاصيه جالسه تقرى وتحمل الكاش مابين الرام والهاردسك حسب حاجتك واستخدامك انت يالمستخدم عشان اول تشغل برنامج المفضل يشتغل معك على طول بشكل اسرع. طبعا الناس اللي مثلي ماتطفي جهازها مبسوطه لان النظام بيظل شغال وباستجابته السريعه حتى لو تخليه شغال 30 يوم عكس الاكس بي اللي يبداء في الثقل بعد كم يوم فا تضطر لاعاده تشغيل جهازك عشان تستعيد سرعته مره ثانيه طبعا بويندوز 7 هالخاصيه مازالت موجوده بس سووا عليها شويه تعديلات بحيث انها ماتاثر على اداء النظام اول ماتشغل جهازك يعني الان بويندوز 7 اول ماتشغل نظامك وتدخل على الدسك توب حقك بامكانك تستخدم النظام بدون اي انتظار وبسرعه وبدون ماتخسر فوائد Superfetch.

خامسا ميزات اعجبتني وانطباعي عن النظام.
فيه بصراحه مميزات اعجبتني مثل الوايرلس الان تقدر تشوف شبكات الوايرلس اللي حواليك وتشبك عليهم من التاسك بار مباشره ماتحتاج تلف وتدور في النظام وايضا فيه ميزه Jumplist اللي تم تطبيقها في قائمه ابداء والتاسك بار يعني تخيل تقدر توصل لمجلدك المفضل او تشغل اغنيتك المفضله او تدخل مواقعك المفضله فقط بكلكين بالاظافه لهذا كله فيه خاصيه AeroPeek اللي تقلب لك جميع النوافذ اللي انت فاتحها الى شفافه 100% تقدر من خلالهم تشوف سطح المكتب مباشره. زي مانتم عارفين بويندوز فيستا ظهرت الصور المصغره في التاسك بار لما تمرر الماوس على النوافذ اللي انت فاتحها تطلع لك صور مصغره بس بعض الاحيان هالصور ماتقدر تميز محتوياتها بويندوز 7 الان اول ماتحرك الماوس على الصورة المصغره وتوقف عليها بتظهر لك النافذه الخاصه بهالصوره المصغره عشان تشوفها صح هل هي النافذه اللي انت تبحث عنها ولا لاء حتى من الصورة المصغره بامكانك تقفل النافذه مباشره بدون الحاجة انك تروح للنافذه الاصليه وتقفلها .

سادسا استهلاك البطاريه.
بويندوز فيستا على اللاب توب حقي اذا بدع اللاب توب جلس شغال ساعتين ونص الى ساعتين و 45 دقيقه كا حد اقصى اما مع ويندوز 7 بهالاصدار تحسن استهلاك الطاقه بشكل ملحوظ فا قدرت مع ويندوز 7 اني اجلس شغال على اللابتوب لمده 3 ساعات بسهوله مع العلم ان البطاريه عندي 6 cell بالاظافه الى ان ويندوز 7 بامكانه يعطيك تقرير بالهاردوير اللي جالس يسحب طاقه من بطاريتك فا تقدر انت من اداره الاجهزه تعطل الهاردوير اللي ماتبيه وبالتالي البطاريه تطول معك اكثر مع العلم انه اعطاني 3 ساعات بدون ماعطل شي.

بصراحه ويندوز7 بمرحلته الحاليه جداا مستقر و اخف باستهلاك موارد الجهاز من ويندوز فيستا بالاظافه الى ان استجابة النظام تحت اي ظرف كان افضل واسرع من الويندوز فيستا ولا ننسى ان هذا كله والنسخه لسى ماوصلت مرحله البيتا يعني مستقبلا ماادري وش ممكن يصير ممكن يكون افضل وممكن يستمر مثل ماهو عليه حاليا ومن رايي انه الان افضل من الاكس بي وفيستا.